पुणे : यंदाचा ‘गुरुवर्य आबासाहेब अत्रे’ पुरस्कार वंचित विकास संस्थेचे संस्थापक विलास चाफेकर यांना, तर ‘इंदिरा अत्रे’ पुरस्कार ‘स्वरानंद प्रतिष्ठान’चे विश्वस्त, तसेच सामाजिक कार्यकर्ते प्रा. प्रकाश भोंडे यांना जाहीर झाला आहे.
शनिवारी, ३० नोव्हेंबर २०१९ रोजी सायंकाळी साडे पाच वाजता, दि रास्ता पेठ एज्युकेशन सोसायटीच्या सभागृहात पुरस्कार वितरण सोहळा होणार आहे. हे दोन्ही पुरस्कार किराणा घराण्याच्या ज्येष्ठ गायिका डॉ. प्रभा अत्रे यांच्या हस्ते देण्यात येणार आहेत.
डॉ. प्रभा अत्रे यांच्या वतीने त्यांच्या आई-वडिलांच्या स्मृतिप्रित्यर्थ दर वर्षी हे पुरस्कार देण्यात येतात. पुरस्काराचे हे आठवे वर्ष आहे. पुणे शहराच्या पूर्व भागातील आर्थिक आणि सामाजिक दृष्ट्या दुर्बल अशा वर्गाच्या उन्नतीकरता झटणारी दी रास्ता पेठ एज्युकेशन सोसायटी ही शिक्षण संस्था नावारूपाला आणण्यासाठी गुरुवर्य आबासाहेब अत्रे व त्यांच्या पत्नी इंदिराबाई अत्रे यांनी आपले संपूर्ण आयुष्य समर्पित केले. आबासाहेब अत्रे यांनी शैक्षणिक कार्याच्या माध्यमातून सामाजिक क्षेत्रातही मौलिक कार्य केले, तर इंदिराबाई अत्रे यांनी कलागुणांची जोपासना करून, त्याचा इतरांना लाभ करून दिला. त्यांच्या स्मरणार्थ हे पुरस्कार देण्यात येतात.
विलास चाफेकर हे जाणीव संघटना व वंचित विकास या संस्थेचे संस्थापक आहेत. देवदासींना मूळ प्रवाहात आणण्याचे कार्य ही संस्था करते. वयाच्या १७ व्या वर्षी विलास चाफेकरांनी भटक्या, झोपडपट्टीत राहणाऱ्या मुलांसाठी काम सुरू केले. आज वयाच्या ७९ व्या वर्षीदेखील ते सामाजिक कार्यात सक्रिय आहेत.
प्रकाश भोंडे हे बृहन्महाराष्ट्र वाणिज्य महाविद्यालयातील निवृत्त प्राध्यापक असून, ‘स्वरानंद प्रतिष्ठान’ संस्थेचे विश्वस्त या नात्याने सांगीतिक क्षेत्रात अभिनव उपक्रमांचे आयोजन करतात. सामाजिक कार्यातही त्यांचा सक्रीय सहभाग असतो.
(वंचित विकास संस्थेविषयीचा लेख वाचण्यासाठी येथे क्लिक करा.)
